Henter flota di Arubus lo tin e sistema di smartcard

Minister Otmar Oduber: E promer fase di etapa nobo di Arubus a tuma lugar
January 31, 2012
Autobusnan a wordo entrega na Arubus
July 27, 2012

Henter flota di Arubus lo tin e sistema di smartcard

Diahuebs atardi na edificio di Arubus a tuma lugar e firmamento di e acuerdo entre Arubus y Zenitel pa loke ta adkisicion di e smartcards pa busnan di e compania di transporte publico.Minister Otmar Oduber tabata presente caminda cu el a duna di conoce cu ta un honor grandi pa ta eynan na e ocasion aki despues di un trayectoria largo hunto cu Hunta di Comisario y Directiva di Arubus pa hinca un plan integral den otro y haci di e empresa cu na inicio di gobernacion tabata practicamente bancarota, den uno cu lo ta saludabel financieramente y pa su servicio.E mandatario a gradici e Hunta di Comisario y Directiva pa e empeño cu nan a pone y pa e rapport di saneamento integral cu a conduci cu a haya confianza for di Aruba Investment Bank cu a duna un fianza inicial di 5.5 miyon florin cu lo wordo usa pa entre otro e compra di bus y autobusnan nobo, como tambe di e sistema di smartcard, caminda cu Aruba lo bira un di e pioneronan den e region.

Esaki ta e promer fase despues di a haci tur e estudionan necesario, den menos cu un luna lo continua pa por laga e financiamento total tuma lugar pa un suma di 16.5 miyon florin cu ta encera tur e debenan cu Arubus tabatin refinancia cu condicionnan hopi mas favorabel. Na e momentonan aki e fianzanan cu tin ta na 8% y na final lo resulta na un interes di 6% reparti riba un trayectoria di 10 aña, cu un balloon na final cu por bay hasta 15 aña si tin mester€, Minister Oduber a duna di conoce. El a agrega cu e proyeccion ta mustra cu desde otro aña caba ta cuminsa un proceso di un reserva pa Arubus pa ora yega na entre 5 pa 10 aña cu mester cuminsa wak den direccion di vehiculonan nobo, pa por tin e fondonan necesario pa por rehuvenece e flota di Arubus pa por brinda un servicio optimal na comunidad. Comentando riba e busnan cu lo ta na caminda, esta 15 bus nobo di marca International, y 16 autobus adkiri na un compania local. Es decir, 31 bus nobo cu lo bin adicional na e flota cu ta usabel ainda. Hunto cu esaki lo bin un ampliacion di e rutanan actual pa di e forma por duna mas servicio, drenta den mas bario, rutanan cu accesibilidad pa transporte publico lo por ta hopi mas efectivo y na interes di nos comunidad.

Banda di esaki lo bin cu un sistema moderno di smartcard cu a wordo gana dor di e compania Zenitel. Entrante 1 di juli, na momento cu tur e cambionan tuma lugar na Arubus, lo introduci e sistema tambe caminda cu tur usuario por registra pa haya su carchi y lo por wordo recarga na diferente parti di nos isla. E sistema lo wordo instala riba henter e flota di Arubus.Idea pa bin cu e smartcard ta entre otro pa haya sa cual ta e load factor di e busnan, con hopi un persona ta usa e servicio, ki ora tin mas hende, ki tipo di hende ta use. Esaki por wordo logra pasobra e carchi ta duna informacion si ta p.e. pensionado, muchanan di scol of otro personanan ta haci uso di e servicio di bus. Tambe ta permiti pa controla e ora cu e servicio por wordo usa, manera por ehempel un mucha cu ta bay scol ta bisa si e ta bay den dia of anochi y asina por controla en berdad e uso di dje y no cu e lo por wordo malusa Minister Oduber a duna di conoce cu riba su peticion a hinca un categoria nobo, esun di deportistanan. Hobennan cu ta practica deporte y cu ta asocia na un club reconoci na Aruba. Nan lo bin na remarke pa haya e mesun tarifa di e muchanan cu

ta bay scol y asina fomenta y encurasha nos hobennan pa haci deporte. E mandatario a indica cu esaki ta un peticion cu a wordo haci riba su persona y e na su bes a mira cu tin espacio pa por hacie. Un otro ventaha di e smartcard ta cu ta duna oportunidad pa evita e subsidio di tarifa di Arubus pa turista dor di Gobierno. Entrante 1 di juli esnan cu subi bus sin smartcard lo tin cu paga un tarifa di 4 Florin, en bes di e 2,25 cu ta wordo paga na e momentonan aki. Nos ta encurasha comunidad di Aruba pa yega na e smartcard, pasobra si bo no tine, esey ta significa cu bo tambe tin cu paga e 4Florin na porta ora subi e bus€, Minister Otmar Oduber a duna di conoce.

Comments are closed.

Back
Messenger
Email