Dialuna mainta den presencia di Minister Otmar Oduber, a tuma lugar e firmamento di e fianza entre Arubus y Aruba Investment Bank, cu lo permiti mehoracion di servicio di e empresa di transporte publico na nos isla.

Minister Oduber a duna di conoce cu como Gobierno ta doño di 100% di e accionnan di Arubus, nan ta sumamente contento cu e desaroyo aki, enfatizando riba e trabou cu a wordo haci pa Hunta di Comisario conhuntamente cu directiva di Arubus. Nan a haci posibel cu por a sinta na mesa cu Aruba Investment Bank pa comienzo di e proceso di restructuracion di e aspecto financiero y restructuracion total pa loke ta trata maneho di Arubus.

Continuando, Minister di Transporte a indica cu a firma e promer fase di dos fase cu tin pa loke ta trata e acuerdo di fianza entre Aruba Investment Bank y Arubus. E promer fase ta pa un suma di 5.5 miyon cu lo mester wordo destina pa cumpra 16 autobus nobo y 15 bus grandi nobo. Parti di e suma aki tambe lo bay pa e proceso automatiza di smart card pa di e forma aki tur hende cu ta usuario di Arubus por haci uso di dje, caminda cu e accesibilidad di dje lo bira uno mas amplio riba Aruba.

E promer fase aki lo mester conduci, despues cu acudi na Parlamento pa diferente cambionan cu mester tuma lugar, na un refinanciamento total di Arubus pa un suma di 16.5 miyon florin. Esaki ta encera cu tanto e debenan bieu di e compania di transporte publico y tambe esunnan nobo, como tambe debenan atrasa pa e gastonan social cu ta core for di memei di aña 2009,

lo wordo cubri. Asina Arubus lo por cuminsa cu un etapa nobo.

Mas aleu e mandatario a duna di conoce cu e business plan pa Arubus ya caba ta den ehecusion mientras cu Gobierno tambe tin compromisonan pa loke ta trata e subsidio duna na e compania aki.

Ya caba a inicia e proceso cu ta wordo presenta den e business plan di reduccion di 15 miembro di personal di Arubus, caminda cu ya tin 9 persona cu a bay voluntariamente. Awor lo mester sigui conversa cu 6 persona mas pa di e forma aki contribui na por logra e meta di haci du Arubus un compania financieramente fuerte un biaha mas.

Minister Otmar Oduber a enfatiza un biaha mas cu no lo bin cu aumento di tarifa di Arubus. Arubus kier demostra promer cu e tin e deber pa duna un servicio na e nivel cu e merece. Pa tal motibo nos a tuma e decision cu una bes e flota nobo tey, cu una bes cu e netwerk pa loke ta trata servicio na mas tanto barionan na Aruba ta in place, cual ta verwacht cu lo ta cla pa 1 di juli, for di e fecha ey lo adapta e prijs. For di e momento ey no lo duna e descuento mas di 25 cent riba e trip€.

Finalizando, Minister Oduber a expresa cu esaki ta un momento grandi pa Arubus mirando cu ta trata di un transformacion total di un compania mediante di e cambionan cu a tuma lugar den statuut pa por amplia e tareanan di Arubus, pero tambe di un compania cu awor lo wordo completamente renova caminda cu lo conta cu 31 bus nobo y un compania cu su servicio lo haya un mehoracion na bienestar di henter comunidad.