Diasabra ultimo den un ambiente masha ameno a tuma lugar un bike tour caminda mas cu 30 empleado di Arubus a topa pa 6or di mainta na Arubus Sabana Blanco y pa 6:30 am a sali rumbo pa Arashi. Mester bisa cu e ambiente cu tabata reina entre empleadonan ta uno masha special y sumamente agradabel. Pa tur presente e sorpresa agradabel tabata ora e Director Sr. Teo Croes a presenta pa asina hunto cu tur e demas empleadonan participa na e bike tour aki. Mester bisa cu a sali for di Sabana Blanco caminda bou guia di Polis, a tuma caminda grandi bay direccion Busstation Oranjestad, caminda a para pa sosega 5 min. A sigui direccion Arashi via e low rise hotelnan. Mas o menos pa 7:30 am a yega Arashi caminda a keda combersa, bebe algo y come fruta.
Aki nos por a scucha nos Director sumamente contento y orguyoso bisa cu esaki ta e promer di e hopi nan cu lo sigui y caminda e compania ta motiva pa tuma un direccion pa promove mas salud pa nos empleadonan. E la sigui bisa cu hopi biaha nos ta enfoca ariba placa of condicion nan di trabao y nos ta neglisha nos salud.
E ta den ventaha di empleado tanto como di e compania pa tin empleado nan cu ta hasi un deporte, pa e empleado su saludo y pa e compania disminui e AO.

Mester splica cu algun luna pasa a cuminsa un proyecto caminda a acerca algun compania cu ta bende mountain bikes y aki a yega na acuerdo pa tur empleado nan por a yega na un mountain bike. Mester menciona cu esaki tabata un exito rotundo caminda hopi empleado a sa di haci uso di e oportunidad aki. For di e momento aki a lanta un pasion entre empleadonan pa por cuminsa core bais hunto y pa e motibo aki a yega na e promer bike tour cual a tuma lugar diasabra ultimo. A keda palabra cu esaki lo keda ripiti y lo purba pa tur luna por tin mas di esakinan.

Arubus kier a gradici na promer lugar tur empleado cu a participa na esaki y haci e bike tour aki un exito rotundo, tambe no por keda sin gradici Sr. Eddie Maduro di cuerpo policial cu a coopera cu esaki, tambe kier a gradici Tribike Aruba y Radio Shack cua a coopera en grande cu e proyecto di Mountain Bike di nos compania.

Arubus awor lo promove mas movecion y salud pa tur nos empleadonan.